ألق الفصول
يمة السلام
يمة سلام والرحمة والغفران دوام
من ربً كريم معبود مطاع
يمة السلام والدنيا صارت كوم جمر
لما الحزن يا يمة كجولو الشراع
ابحرنا يمة مع الحزن ابحر بعيد
وركبنا في بحر الضياع * والله ما بنقول وداع
كيف الوداع ما أنت فينا على الدوام
مصبوغة في الروح والضلاع
ما أنت جوه الجوف شعاع * ساكن المفاصل والضلاع
يا صحبة النور الدفق * شرف ثنيات الوداع
يا كافلة للأيتام زمن * في همة تتحدى السباع
يا حلية في جيد الزمن * زادت جواهره التماع
يمة يا ألق الفصول * يا شليلنا الفينا ضاع
أربع فصول يايمة * لابسة حداد وناع
الصيف ممرغ في الحنين * والقمره شاويها الأنين
مشتهية نفشك للقطن * ومترارك القلب اليراع
والونسة يمة وطرفتك * روحك تعنق بسمتك
ممزوجة منداحة وشعاع * والصيف بيسأل ( عشة وين ؟)
قلنالو جوه الجوف وطن * معمور وساكن للنخاع
جانا الخريف من غير دعاش * رعدو ونسايمو يهتفن
مجروح على السفر البقى * محتار وشاكي من الزمن
عايز ملاقاتك وكت سُحبو الهناك اتجمعن
فاقداك سحابة تظللك * يايمة وكت الجو اصن
فاقداك نسمة تبللك * يايمة في زراعة القطن
لي فوق بتعرج همتك * والدنيا يوت تلد المحن
يايمة طبع الزمن * دايماً بعزل في النفيس
والأصلو ما جايب تمن * راقد مدفق بالشحن
يمة الربيع سافر معاك * جافا المناطق وحترن
والزيزفونة الكاجة في قلب السكن * يبس عروقة وجففه
خلاها لا روح لا بدن * ويبس حلوقنا مع الحشا
خلانا في الحسرات نإن
أربع فصول
الزمهرير الفيهو جافيتي السكن * ضربت مواويلو الدغش
دخلت مسامات البدن * تسأل عليك في كل طريق
حتى الحواري البدرن
ماكنت فيهن يا ام نفل * عشان تجاوبيهن اذن
يا زولة من صلصال شرف * فيكي الفضائل تقترف
حزنت عليك كل المدن * بكت المدارات والفصول
و(النور ) محمر في سريرك * يمة ما شايفلو زول
في عيونو نقرأ القمرة وين * وشيشو غرقان في الزهول
عايزين نمردغو في رضاك * إكرف حنانك عرض وطول
بس الزمن قال لينا لا لا * حرمنا يا تومة ( البتول )
حرمنا من نسام رضاك *ودعواتك الفيها القبول
الونسة يمة وطرفتك * والجبنة يمة وجلستك
والناس تعز ليك الرسول * و(النور) يطالع في الوجوه
وشيشو كاسيهو الزهول
يمة السلام يا أغلى زول
( ولدك/ يوسف أرباب